Zločesta vrtoglavica

Osjetljivo

18.01.2012, Kolumne

Autor: RADAR

Veliju Danci kaj su ve na čelu EU da se vu evropskoj interesnoj zajednici više ne budu ponašali kak pijani miljarderi.

Ve budu oni kaj delaju vu evropskom parlamentu i drugdi vu evropskoj birokaraciji i administraciji pili vodu z vodovoda i pelali se na posel vu autobusima. Kajti i vu EU hoćeju i moraju biti socijalno osetljivi. Na nekaj. Socijalno. Da ih ne budu mrzeli oni kaj jedva i vu EU vežeju kraj s krajem sakoga meseca.

A takvih je jako puno svugde po EU. I vu Ugarskoj, Poljskoj, Slovačkoj, Latviji, Grčkoj, Italiji… A kad je takvih puno, oni moreju i van na vulicu zajti. I larmati. I puno tega grdoga napraviti. A štrajk i bunt na vulici ni dobar za Uniju. Kaj ju i onak na kupu drži još sila teža. I viši interesi. Krupnoga kapitala. Jedino bu vu Hrvackoj teklo med i mleko kad dojde(mo) u EU. Kajti je ve tak i onak većini običnih smrtnikov grdo živeti. Praf zapraf jako grdo.

Ali spasenje bu skoro došlo. Kajti biti vu EU je manje zlo nek biti van EU. Tak pripovedaju. I pozivaju. Ve jako puuuno pripovedaju i pozivaju. Se posud. Narod naš svakdašnji. Na radiju, teveju, na placu, vu šahovskom društvu… Kajti je referendum blizu. Jaaako blizu.