Zločesta vrtoglavica

Vu epicentru na cestici

To je denes normalno kajti se je baviti z drugima bolše nek baviti samim sobom. A još lepše ak ti poznati od sebe cirkusa delaju. Zato se kak po žnori o političatima, onima na estradi, i van estrade, o biznismenima, susedima, i drugima puno  pripoveda i piše, i na teveju ih puno ima. Kak reklami za uloške i  mobitele.

Gledi se kak su oblečeni, koje torbice nosiju, kakve broše imaju, kulko pudera i žbuke druge vrste na facu devleju, koga jeb…, kulko hiži i avti imaju. Kam god da  pobegneju,  vu koju god rupu da se skrijeju,  pobeči, ni skriti se nemreju.  I burgemajster Goran kaj ga pišeju Promil, zato kaj je pijani kak deva službeni avto vozil, i nesreću napravil, nemre ni danes od kupice pobeči.

Tulko je rad ima da je i fotelju vu parlamentu zgubil. I kaznu bu dobil. Da mu se najde. Ali  vinčeka se i dalje odreči neće. I piti ga hoće. Kajti mu paše. Pa je ovih dana pak vu epicentru na cestici bil. Vu sitne vure i vinčeko pil. I ni poznato ko ga je posli vozil. Nekam. Ili je on vozil nekoga. Nekam. Murije na cesti vu te sitne vure ni videti bilo. A ni promet na cesti ni bil gusti. Bogu fala.