I tak je 25. svibna 1892., prav istega tega dneva šterega bo Josip Broz razglasil svojim rojstnim Danom mladosti, Nikola Tesla prišel vu Varaždin svojemu vujči Paji Mandiću.

Tesla je još bil mlad (36 let), ali je več bil zbavil posel pri Edisonu, osnoval Tesla Electric Company i postal znani po celemu svetu. Ze Zagreba je prinesel friške Narodne novine, v šterima je pisalo da je razlagal jučer do podne u prisustvu gradskog načelnika i donačelnika, gradskih viećnikah Mallina i Hudovskoga i gradskog mjernika Lenucia svoje nazore.

Za Teslo so to bili slavni, ali i hudi cajti: v Gospiču je v travnu navzočil smrti matere, ter o temu pisal vujči:
Dragi ujače, ne trebam da vam kažem da sam neizmjerno žalostan, nu tješim se koliko možem. (…) Bilo mi je vrlo žao da se nismo mogli sastati ima dvije godine kad sam u toj namjeri prošao kroz Slavoniju. Ovaj put ću gleti da vas ne promaknem i javiću vam za doba đe se možemo sastati.

Potlam je v Zagrebu mel dulji expose, a onda je odišel v Beograd, gdi mu je Jova Jovanović Zmaj pred vsimi zapopeval:

Ne znam, šta je, je l’ suština,
Il’ to čini samo mis’o, –
Čim smo čuli: dolaziš nam,
Odmah si nas elektris’o.

Med tem je „gleo“ da „ne promakne“ vujču, pak je v „doba đe se mogu sastati“ bil vjutro na varaždinskemu kolodvoru.
Vujča Pajo vu Varaždinu je služboval kakti pukovnik avstrovugerske vojske. Kak i vsaki dotepenec, berzo je zavolel grad, posebej nekšne tradicije i delicije, pak je plan Teslinega boravka bil of: pervi den budu pili i jeli, drugi den budu v Kazališču poslušali govor dr. Josipa Franka, a onda budu se skušuvali i rastali.

Ztega je Pajo rekel Nikoli:
„Sad ćeš da kušaš najbolje vino u životu! Idemo kroz Perivoj, gde ćeš da baciš pogled na Kazalište, pa u podrum Bedekovićeve vile.“

Teslin ujak Pajo Mandić službovao je u Varaždinu kao pukovnik austrougarske vojske

Pajo je z vlasnicami vile, Bedekovićevimi naslednicami groficami Kušević i Jordis, dogovoril da mu vstupijo podruma za slavnega gosta. Tam bo jih pričakal njihov, ali i gradski vrtlar Joseph Zeppel, šteri ima zeta Franju Mišinskega, vučitela službojočega v Klenovniku, gdi z pajdašem Štefom dela vrhunskega vina. Budu jim malo narezali, natočili, a ak treba i zasvirali. To bu „muška fešta“, pa sam morajo paziti da ne omeglijo, jer zjutra z groficami trebajo iti dr. Franka poslušati.

Idejo črez Gradskega perivoja, a Tesla veli:
„Lep park, šta je da je! Nije baš ko Central Park, ali ja ću da učinim sve šta možem da i moja domovina bude ko Amerika!“

Pred vilom dočakali so jih vrtlar Zeppel, njegov zet vučitel Mišinski i Kleničanec Štef.

Zeppel, v Češki rojeni Avstrijanec, je vpozoril:
„Dober den, vilkomen, hote, idemo, sam pazite kaj mi nete po travi hodili, feršten? Bite, niht auf gras gehen!“

„OK, tako razumem…“, je odgovoril Tesla.
„Pili bute vino z mojih goric!“, je rekel Štef.

„Šta znači goric? Malih šuma?“, pita Tesla.
„Jao, Nikola, ti takav poliglot, a ne razumeš kajkavski!“, veli Pajo. „U goricama, tamo gde su kleti!“
„Dušman kleti?“
Franjo Mišinski se vmeša:
„Gledajte, ja sam riešio da do kraja ovoga vieka proslavim svoje grožđe na županijskoj izložbi!“
„Sam ti gledaj da se ne buš znapil, moja tohter i ves kup dece te doma čakajo!“, veli mu tast.
„Dajte, japa, najte me…“
Pak so servjerali vina, kruha, putra, špeka, luka, jajec…
„Dobra ova slanina, al nešto je masna…“, veli Tesla.
A Pajo:
„Nikola, to je špek, to tako mora da bude.“
„Još bumo mi vas, gospon Tesla, šteri vse znate, našega jazika i naših običajev navčili! Ja se dam vrezati ak vi do zorje nete kajkavski spregovorili!“, zklikne Štef.
Štef kak da je bil vizijonar vekši od Tesle! Najmre, kak je kaplica prodelala, odpustile so se vse jazične barijere.

Franjo Mišinski, ravnajući učitelj škole u Klenovniku, autorov pradjed

Pripovedalo se o vsemu: o Ameriki, politiki, Obrenovićima, odašiljačima, vojski, ženskami, vrtlariji, Niagari, Liki, Zagorju, cesaru Francu Jozefu, njegovi lepi Sissi… Domačini so čak zagudili na vijolinami, v stilu: Le pijme pijme pijme…

Kak je vreme išlo, tak je Tesla, veliki poligot, vse več razmeval, pak i koristil kajkavske reči.
Pervo je rekel:
„Jao, šta je dobro vino!“
Pak za pol vure:
„Braćo, na ovomu vinu svaka vam čast i – fala!“

A za dve-tri vure:
„Bog naj poživi vse vas i vaše gorice i kleti!“
Gda je več puno litri spil, v jednemu momentu Tesla kak da se je „sav naelektris’o“!
Baš kak v budimpeštanskemu parku, gda je dobil vizijo svojega elektromotorja: pal je v trans! V temu momentu kaj da je vpil vse znanje kajkavskega jazika, ali i vse znanje sveta, tedašnjega i bodočega!

Pak je počel kričati:
„Gledim ja ve i vidim vse! Ve sem zpoznal kak razcepiti atoma! Ztega bi se dobila tak velika energija kaj bi se cela Zemla mogla ne z mojom strujom, neg z atomskom energijom obskrbiti! I mogel bi atomskega orožja zmisliti, štero bo označilo konca vseh vojni, jer se nigdo ne bo ni vupal više ratovati! I vse bum to ostavil Srbom i Horvatom, kaj budu onda oni, skup v jedni zemli živeči, najvekša svetska sila!“

Onda je začel blebetati:
„I brezžičnega sistema sem videl, šteri bo omogučil slanje i razmeno vseh verst podatkov po celemu svetu! Vse sem videl – zahvaljojoč ovemu vašemu vinu! I videl sem…“
Drugi so ga v šoku lukali. Pak se je još glasnejše počel derati, kak da je noja povsem obsela njegove velike možđane:

„…i videl sem, v megli sem videl, seh križneh putov konec i kraj! V meglenom blatu, v pogrebnom maršu, otkod nas nigda več nebu nazaj, Ileri kak pilki, faklonosi, zaškrabani dijaki, larfonosi, pokapali su paradno starinsku reč Kaj. Kak zvon je Kaj grmelo, kak kres je Kaj plamtelo, kak jogenj, kak harfa vekomaj!!!“
I onda se zrušil, omeglen.

Noja je včinila svoje. Vjutro se nigdo ni ničeg zmislil. Ni Zeppel, ni Mišinski, ni Štef, a ni Tesla: nit se mogel zmisliti nijedne kajkavske reči, nit se mogel zmisliti atomske energije. Nekaj mu je v glavi ostalo od brezžičnega sistema, ali to nigdar več neje mogel tak artikuljerati kak je videl v tej noči.

I tak so morali razočarati grofice i odkazati poseta Frankovemu govoru, jer so vsi bluvali. Morti i bolje, jer je Frank tam priznal Nagodbu z Peštom, kaj se ne bi zdopalo Tesli, šteri je zagovarjal vezo Zagreba z Beogradom.

Morti i bolje da je Tesla pozabil najvekše vizije v hištoriji svetske znanosti, jer tak je Tito slavil vse svoje Dane mladosti brez da je mogel prikazati jugoslavenskega nuklearnega arsenala.
Naravoučenije? Vsako zlo za nekšno dobro!

Priča o Tesli u posjetu ujaku Paji Mandiću

U dogovoru s autorom objavljujemo kratku priču “Kak je Nikola Tesla prišel vu Varaždin” Denisa Peričića iz njegove najnovije knjige “Tijelo od snova”. To je već 27. Peričićeva autorska ili suautorska knjiga, a četvrta njegova zbirka priča. Knjigu je objavila poznata zagrebačka nakladnička kuća Hena com uz potporu Ministarstva kulture RH, a uredio ju je Kruno Lokotar.

Fikcija na temelju činjenica

“Kak je Nikola Tesla prišel vu Varaždin” jedina je u cijelosti kajkavska priča od njih 19 u novoj knjizi, ali to je isključivo zato što je autor nedavno objavio zbirku svojih sabranih kajkavskih priča (“Techno gost”, Kajkavsko spravišče, Zagreb, 2016.). Krajem prošle godine Denis Peričić je priredio i knjigu “Vizionarske misli” Nikole Tesle (Šareni dućan, Koprivnica, 2017.), pa je u ovoj priči spojio dva svoja područja interesa: fenomen Tesle pretočio je u svojevrsnu povijesnu humoresku. Iako su zbivanja u njoj umnogome izmišljena, ona su se ipak mogla dogoditi, jer je Tesla 25. i 26. svibnja 1892. doista u Varaždinu posjetio svog ujaka Paju Mandića, a i sve ostale osobe koje se spominju u priči tih su dana boravile (ili su mogle boraviti) u baroknom gradu, od Josipa Franka do autorovih predaka.

Posrijedi je književna tehnika tzv. faction fictiona, fikcije (izmišljaja) na temelju činjenica, koju autor koristi i u drugim svojim pričama, od kojih su mnoge nagrađene: Denis Peričić je za priče, pjesme, drame, eseje, kritike i druge književne forme dosad dobio čak 76 nagrada, po čemu je, kako je nedavno na HTV-u istaknula kritičarka Jagna Pogačnik, “neka vrsta književnog fenomena”.
Osim toga, priča “Kak je Nikola Tesla prišel vu Varaždin” na prošlogodišnjem, 13. natječaju za kratku kajkavsku prozu, odlukom ocjenjivačkog povjerenstva (dr. Ivo Kalinski, u međuvremenu preminuli prof. dr. Joža Skok te dr. Božica Pažur), od svih je pristiglih radova odabrana kao prva za objavu u časopisu “Kaj” br. 1-2/2018.

Zbirka priča “Tijelo od snova” Denisa Peričića može se nabaviti kod nakladnika: HENA COM, Horvaćanska 65, 10000 Zagreb, e-mail: [email protected], www.hena-com.hr, tel. 01/375 60 37. Cijena s popustom je 98,10 kuna. Izvrsnu fotografiju na naslovnici snimio je Srećko Lebinec.

Varaždinsko predstavljanje knjige najavljeno je za 13. rujna u Gradskoj knjižnici i čitaonici “Metel Ožegović” u 19 sati. Govorit će Kruno Lokotar, dr. sc. Mario Kolar i autor.